Erasmus+ Əsas Fəaliyyət 2 layihələri (Erasmus+ KA2)
REFRESH layihəsi
UNEC-in koordinatorluğu ilə hazırlanaraq təqdim edilən “Azərbaycan universitetlərində yaşıl və davamlı qlobal iqtisadi təkmilləşdirmə: bərpa olunan enerji mənbələrinin və iqlim dəyişikliyinin mitiqasiyası (REFRESH)” layihəsi Avropa komissiyasının Erasmus+ proqramı tərəfindən maliyyələşməyə qəbul olub.
Ümumi dəyəri 703 min avro olan REFRESH layihəsinin məqsədi Azərbaycan universitetlərində bərpa olunan enerji mənbələri üzrə keyfiyyətli tədrisin əsasını qoymaqdır. Bu baxımdan layihə bərpa olunan enerji mənbələri üzrə universitetlərdə yerli kadrların hazırlanması və “Azərbaycan 2030: sosial-iqtisadi inkişafa dair Milli Prioritetlər” strateji sənədinə töhfə verəcəkdir.
Layihə 3 il müddəti əhatə edir və konsorsiumu 6 yerli, 4 Avropa universiteti və qeyri-hökumət təşkilatı olmaqla, 15 tərəfdaşdan ibarətdir.
REFRESH layihəsinin tərəfdaş universitetləri:
ENGAGE layihəsi
Layihənin əsas məqsədi Azərbaycanın müvafiq ali təhsil müəssisələrində sahibkarlıq ekosisteminin gücləndirilməsindən, akademik heyətin və tələbələrin sahibkarlıq düşüncəsinin inkişaf etdirilməsindən və innovativ yanaşmanın təkmilləşdirilməsindən ibarətdir. Layihə çərçivəsində reallaşdırılması nəzərdə tutulan tədbirlər ali təhsil müəssisələrində daha çox innovativ ideyaların yaradılmasını, tədris prosesinin məzmununda praktiki komponentlərin artırılmasını, startap fəaliyyətlərinin genişləndirilməsini və universitet–sənaye əməkdaşlığının inkişaf etdirilməsini nəzərdə tutur. Layihənin icrası zamanı Avropa İttifaqı ölkələrini təmsil edən tərəfdaş universitetlərin müsbət təcrübəsi öyrəniləcək, layihədə iştirak edən Azərbaycan ali təhsil müəssisələrinin əməkdaşları üçün çoxsaylı təlimlər təşkil ediləcək.
MDU-nun koordinatorluğu və idarəçiliyi ilə həyata keçiriləcək ENGAGE layihəsi 36 ay ərzində reallaşdırılacaq. Layihənin ilkin büdcəsi 800 min avrodur.
Layihənin əsas benefisiarları qismində Azərbaycanın 11 ali təhsil müəssisəsi (Mingəçevir Dövlət Universiteti, Bakı Biznes Universiteti, Azərbaycan Dövlət İqtisad Universiteti, Azərbaycan Texniki Universiteti, Bakı Ali Neft Məktəbi, Azərbaycan Dövlət Mədəniyyət və İncəsənət Universiteti, Azərbaycan Turizm və Menecment Universiteti, Gəncə Dövlət Universiteti, Naxçıvan Dövlət Universiteti, Azərbaycan Dövlət Aqrar Universiteti, Odlar Yurdu Universiteti) nəzərdə tutulub.
Eyni zamanda, layihənin Azərbaycandan olan tərəfdaşları sırasında Azərbaycan Respublikası Sahibkarlar (İşəgötürənlər) Təşkilatları Milli Konfederasiyası (ASK) və Azərbaycanda Qadın Sahibkarlığının İnkişafı Assosiasiyası (İB) da yer alıb.
ENGAGE layihəsinin 5 Avropa İttifaqı ölkəsini təmsil edən tərəfdaş universitetləri:
Estoniyadan Tallin Texnologiya Universiteti (Tallin University of Technology)
İsveçdən KTH Royal Texnologiya İnstitutu (KTH Royal Institute of Technology)
Portuqaliyadan Lissabon Universiteti (University of Lisbon)
İspaniyadan Kataloniya Politexnik Universiteti (Polytechnic University of Catalonia)
Polşadan WSG İqtisadiyyat Universiteti (WSG University of Economy)