UNEC-in təşkilatçılığı ilə V Milli Kitab Sərgisi günlərində Bakı Fotoqrafiya evində Xalq yazıçısı, Azərbaycan Yazıçılar Birliyinin sədri Anarın 85illik yubileyinə həsr olunan "Gəlin birgə oxuyaq" adlı tədbir keçirilib.

“Heydər Əliyev İli”nə həsr olunmuş “Oxu mədəniyyəti” layihəsi çərçivəsində keçirilən tədbirdə çıxış edən UNEC Kitabxana-İnformasiya Mərkəzinin direktoru, tar.ü.f.d. Adilə Abdullayeva "Gəlin birgə oxuyaq" kitab marafonu barədə məlumat verib və tədbirin layihə çərçivəsində növbəti görüş olduğunu bildirib.

Tədbirdə “Qobustan” jurnalının baş redaktoru, gənc yazıçı Pərvin Nurəliyeva UNEC-də "Oxu mədəniyyəti" layihəsinin keçirilməsini yüksək qiymətləndirərək, kampaniyasının novbəti tədbirlərinə uğurlar arzulayıb. P.Nurəliyeva görüşdə Anarın elmi, pedaqoji və yaradıcılıq fəaliyyətindən söz açıb. Anar yaradıcılığının yorulmaz tədqiqatçısı olan gənc yazar onun ayrı-ayrı əsərləri barədə səsləndirilən sualları ətraflı cavablandırıb, eyni zamanda Xalq yazıçısı Anara məxsus “Unudulmaz görüşlər” və “Səhər-səhər: esselər, publisistik yazılar”, “Əsərlər”, Anarın həyat və yaradıcılığına həsr edilmiş “Anar-80: Şəxsiyyətin tarixi”, Günel Anarqızının «Нет, то есть да» kitablarını UNEC Kitabxana-İnformasiya Mərkəzinə hədiyyə edib.

Sonra UNEC Yaradıcılıq Mərkəzinin Bədii Qiraət dərnəyinin üzvü, UNEC-in II kurs tələbəsi Nihat İskəndərlinin ifasında ədibin “Asqılıqda işləyən qadının söhbəti”, “Sayların sərgüzəşti” hekayələri səsləndirilib. 

Ədibin əsərlərinin qiraəti tədbir iştirakçıları tərəfindən maraqla qarşılanıb.