Əsas Tədris Binası Bakının tarixi memarlıq tikililərindən sayılır. Bina XX əsrin əvvəllərində Bakı milyonçusu Musa Nağıyev tərəfindən tikdirilib. Həmin vaxt binada "I Realını Məktəbi" yerləşib. Klassik üslubda tikilmiş binada müxtəlif illərdə bir neçə dəfə təmir-bərpa işləri aparılıb.

Universitetin 1 saylı tədris binası 3 ayrı tikilidən ibarət olmaqla Səbail rayonu İstiqlaliyyət küçəsi 6 ünvanında yerləşir. Tədris və inzibati heyətin yerləşdiyi bina 3 mərtəbə, zirzəmi və mansard olmaqla 14599,6 m², 3 nömrəli tələbə poliklinikasının və "UNEC Extern" mərkəzinin yerləşdiyi bina 2 mərtəbə və mansard olmaqla 565,1 m², 7/24 elektron kitabxananın yerləşdiyi bina isə 3 mərtəbə olmaqla 284,4 m² faydalı sahədən ibarətdir. O cümlədən inzibati və pedaqoji struktur bölmələr üzrə otaqlar 3832 m², auditoriyalar 3853m², laboratoriyalar 190 m², kitabxana otaqları 598 m², yeməkxana 880 m², akt zalları 736 m² və poliklinika 178,1 m², nəşriyyat 187 m² təşkil edir.