UNEC-in Elmi Şurasında 2022-ci il ərzindəki maliyyə-təsərrüfat fəaliyyətinin nəticələri haqqında İqtisadi məsələlər üzrə prorektor Nəsimi İsmayılovun hesabatı dinlənilib.

Hesabatda bildirilib ki, 2023-cü il tarixindən tətbiq edilmiş əməkhaqqı artımından sonra hazırda UNEC üzrə orta aylıq əməkhaqqı 1296 manat, pedaqoji heyət üzrə orta aylıq əməkhaqqı isə 1486 manat təşkil edir. Hesabat ilində saathesabı əməkhaqlarının artırıldığı da qeyd olunub. 2022/2023-cü tədris ilindən etibarən bir saata görə ödənilən əməkhaqqı Beynəlxalq Magistratura və Doktorantura Mərkəzində 27 manat, UNEC Biznes Məktəbi, Beynəlxalq İqtisadiyyat Məktəbi və SABAH Mərkəzi istisna olunmaqla digər fakültə, məktəb, mərkəz və kafedralar, eləcə də yay semestri üzrə professor və ya elmlər doktoru üçün 15 manat, dosent və ya fəlsəfə doktoru üçün 12 manat, elmi dərəcəsi və elmi adı olmayanlar üçün 9 manat müəyyən edilib.

UNEC-in tədqiqat universitetinə çevrilməsi istiqamətindəki strateji hədəflərinə uyğun olaraq, tədqiqatların stimullaşdırılması məqsədilə nüfuzlu elmi jurnallarda məqalə çapına görə 4500 manatadək pul mükafatının verildiyi diqqətə çatdırılıb. 2022-ci ildə UNEC əməkdaşlarına nüfuzlu elmi jurnallarda nəşr olunan məqalələrə görə ümumilikdə 288,3 min manat mükafat ödənildiyi qeyd olunub.

Bununla yanaşı, 2022-ci ildə UNEC-də aparılan elmi-tədqiqat işlərinin dəstəklənməsi məqsədilə ilk dəfə olaraq qrant müsabiqəsinin keçirildiyi bildirilib. Müsabiqəyə UNEC büdcəsindən UNEC Tədqiqat Fondu ilə birgə 150 min manat maliyyə vəsaitinin ayrıldığı deyilib.

Təhsilin demokratikləşdirilməsi məqsədilə UNEC-də hibrid auditoriyaların yaradıldığı, 2022-ci ildə bu auditoriyaların sayının 100-ə çatdırıldığı vurğulanıb.

Hesabatda UNEC-də ən müasir avadanlıqlarla təchiz edilmiş Rəqəmsal nəşriyyatın qurulduğu da qeyd olunub. Yeni nəşriyyatda yüksək keyfiyyətli çap məhsullarının, kitabların, şəkil və müxtəlif promo məhsulların hazırlandığı bildirilib.

Hesabat dinlənildikdən sonra şura üzvləri tərəfindən qəbul olunub.